“हेलो म्याम, नमस्कार ।”
उसलाई पुरानो अफिसका लेखापालको फोन आयो ।
” नमस्कार सर, सन्चै हुनुहुन्छ ?
अनि धेरै समयपछि सम्झनु भयो त । केही विशेष थियो कि?”
उसले खुल्दुली प्रकट गरि ।
“अँ, त्यसै भन्नुपऱ्यो म्याम । हेर्नुस् न अघि एकजना कर्मचारीको मोबाइलमा २०० रुपैयाँ हालिदिएको त हतारमा हजुरको मोबाइल नम्बरमा पुगेछ । त्यहीँ पैसा फिर्ता गरिदिनुहुन्छ कि भनेर ।”
लेखापालले अलि अप्ठ्यारो मान्दै भने ।
“जाबो २०० को लागि पो सम्झनुभएको?”
उसको कुरालाई स्पष्टीकरण दिँदै लेखापालले भने,
“के गर्नु त म्याम, बेलुकी हिसाब बुझाउँदा छोडिसकेको मान्छेको नं. किन मोबाइलमा राख्नुपर्यो त भनेर हाकिम साबको खप्की सुन्नुपर्छ ।”
“हाकिमको खप्की खाँदा छोडिसकेको मान्छेको एक महिनाको तलब एक वर्षसम्म बाँकी राख्न मिल्छ भने मोबाइल नं. चाहिँ किन राख्न नमिल्नु र भनिदिनुहोस् न।”
उसले पीडा मिसिएको भावमा भनी ।
बूढानीलकण्ठ, काठमाडौँ
= संकलन: तारा के. सी
