हुन त
धेरै नै बर्ष भइसक्यो
पुरानो भयो र फाट्यो
अन्त्यमा मक्किएर धुजा धुजा भइ
खै कहाँ मिसिन गयो त्यो जुत्ता ।।
हजुरबाले यस्तै दशैमा
बजार बाट त्यहीँ मिल्ट्री जुत्ता ल्याइदिनुहुँदा
लागेको थियो,
संसारमा म भन्दा भाग्यमानी को होला??
पुरानो भयो र फाट्यो
अन्त्यमा सक्किएर हावामा,खोलामा,आकाशमा
खै कहाँ मिसिन गयो त्यो जुत्ता।।
हुन त धेरै बर्ष भइसक्यो
हजुरबाले किन्दिएको मेरो त्यो जुत्ता जस्तै
हजुरबा पनि उमेर र आयुको जिन्दगीबाट
क्रमश:मक्किदै मक्किदै
अन्त्यमा यो सांसारिकता बाटै सक्किएर
खै कहाँ मिसिन जानू भो।।
धेरै नै बर्ष भइसक्यो
आज म बाउ बनिसक्दा सम्झिरहेछु
हजुरबा भएर अभावमा पनि
नातिप्रतिको उत्तरदायित्वको कठघरामा
आफैलाइ उभ्याइरहेको छु।।
हुन त धेरै बर्ष नै भइसक्यो
तर मलाई पनि सम्झनाका बच्पनाहरुले छोडेका छैनन
हजुरबाको र मेरो त्यो दशैँ
मैले मिल्ट्री जुत्ता पाएको दशैँ पोहोर नै जस्तो लाग्छ
तर,यस्ता दशैँ र यस्ता पोहोरहरु धेरै आएछन
र ,यसपाली पनि आएको छ एउटा त्यस्तै दशै
अक्सर यस्ता दशैहरु
प्रत्यक साल आउने गर्छ
मेरो हजुरबाको प्रतिबिम्ब लिएर।।
साँझा बस्ती,खोटाङ
