तिमीसंग यति कुस्तुर छौँ
कि
हामी तिम्रो नाम लिन पनि हच्किन्छौं
तिमीलाई यति माया गर्छौं
कि
जीवन तिमीमा नै समर्पित गरेका छौं
हामीले नाम नलिएरै
थुप्रै पटक नाम लिइरहेका हुन्छौं
कामना नगरेरै
धेरै पटक तिम्रो कामना गरिरहेका हुन्छौं
हाम्रो भूल्ने लाख प्रयत्नका बीच पनि
हामी भूल्न नसकिरहेका हुन्छौं
तिमीलाई भूल्ने अभिनय गर्दा-गर्दा
जीवनको रंगमन्चमा
हास्यास्पद अभिनेता बन्दछौं
तिमीबाट….
पऽऽऽर
धेरै पर भाग्न चाहन्छौं
नाम, ऐश्वर्य र सुविधाको पर्खाल लगाएर
सुतुरमुर्ग झैं
सूरक्षाको तन्ना ओढेर सुतिरहन चाहन्छौं
र
पापका कोरहरू
शरीरभरी टाँसेर हिंडिरहेका हुन्छौं
हे ! पृय मृत्यु
हामीसंग जिस्किन्छौ
र वरिपरी ढलिमली गरिरहन्छौ
जब
हामी जीवनको महापीडामा हुन्छौं
तब प्रेमी झैं तिम्रो आव्हान गर्छौं
आफ्नो प्रकाशमय सौन्दर्य छर्दै तिमी प्रकट हुन्छौ
जब एकपटक अँगाल्छौ
हामी पीडाबाट पूर्ण मुक्त हुन्छौं
तिम्रो चुम्बनमा त्यो तृप्ति छ
मात्र एक चुम्बनपछि
फेरी अर्को चुम्बनको जरुरत पर्दैन !
