हामीले भेट्नु चाहेको एक भगवान-
लाई भगवानको कुर्सीबाट हटाउन,
भेट्न चाहन्छौँ
निक्कै उचाइमा बस्नेलाई
खसाउन
त्यहि उचाइमा पुग्नुपर्छ
हामी सधैं बनाउने निधो गर्छौँ,
बाबेलको टावर !
हामी अलिकति उचाइमा पुग्छौँ ।
धर्तीमा ओर्लान्छ ऊ
र हामीलाई विभाजित गरिदिन्छ,
लाग्छ यो हाम्रो संघर्ष नभएर
शिशिफसको मिथ हो
निश्चित छ, हातको ढुंगा खस्नु
सायद यो हाम्रो संघर्ष नभएर
प्रोमिथसको कलेजो हो
निश्चित छ एउटा चिलको भोजन
उसले कुनैबेला चाहेको थियो हामी
केहि नसुनौँ,
केहि नदेखौँ,
केहि नबोलौँ
हाम्रो निर्णय पनि यहि छ
बाबेलको टावर नबनाईसकुन्जेल हामी
केहि सुन्नेछैनौँ,
केहि देख्नेछैनौँ,
केहि बोल्नेछैनौँ
प्रोमिथसको कलेजो खाने चीललाई
हेराकल्सले मारेको थियो
यही मात्र थाहा छ हामीलाई
हामीले १०० पटकसम्म
शिशिफसको हातको ढुङ्गा गुर्केको हेर्यौं
र गयौँ
आफ्नो सत्यको चित्र मस्तिस्कमा कोरेर
१०१औं पटकमा,
प्रोमिथियस गएको थियो शिशिफसलाई सघाउन।
यतिबेला, उनीहरू ढुंगामा आडेस लाएर
पाहाडको टुप्पोमा आराम गरिरहेछन् !
