लघुकथा: छोरी

“चमेलीले यसपालि पनि छोरी पाई भने तैले अर्को बिहे गर्नुपर्छ बुझिस्, माहिला !”, आमाले आदेशात्मक शैलीमा भनिन् ।
“बच्चा जन्मँदा दुईपल्टै अप्रेसन गर्नुपऱ्यो। चमेली पनि कमजोर छे । बच्चा पुग्यो । बिहे गर्ने कुरो हुँदैन, आमा ।” माहिलाले सानो स्वरमा जवाफ दियो ।
आमाले जङ्गिदै भनिन्, “छोरो भएन भने वंशनाश हुन्छ । लाछी कुरो नगर माहिला ! मर्दका दुइटी स्वास्नी भएर केही बिग्रिदैन । चलेकै रीत हो । चमेलीले छोरो दिन सकिन र पो भनेकी । खुरूक्क अर्को बिहे गर् । छोरो जन्मिहाल्छ कि । नातिको मुख नदेखी मरियो भने हाम्रा लागि स्वर्गको ढोका पनि खुल्दैन ।”
माहिलाले आमालाई सम्झाउन खोज्यो, “छोरी मात्र पाउनुमा चमेलीको दोष छैन । मैले अर्को विवाह गर्दैमा छोरै हुन्छ भन्ने के ग्यारेन्टी ? डाक्टरले भनेको छोरा वा छोरी हुने महिलाले गर्दा होइन पुरूषले गर्दा हुन्छ रे ।” आमाले मुन्टो बटारिन् ।
माहिलाले आमाको हात समाउँदै भन्यो, “ल भन्नुहोस् त, आमा ! उल्टै चमेलीले मलाई तिमीले गर्दा छोरो भएन । अब म अर्को बिहे गर्छु भनी भने मैले के गर्नु ?”
( दृष्टि लघुकथा सङ्ग्रहमा सङ्ग्रहित लघुकथा ‘छोरी’ )
⁰⁰⁰⁰⁰
– रूद्र अधिकारि `निर्दोषी′
इटहरी- १९, सुनसरी
हाल: लन्डन, बेलायत