काठमाडौँ। सुनकोशी वाङ्मय प्रतिष्ठानको प्रथम वार्षिक साधारण सभा शुक्रबार राजधानीमा सम्पन्न भएको छ। सो सभाले छविरमण सिलवालको अध्यक्षतामा नयाँ कार्यसमिति चयन गरेको छ।
कार्यसमितिको उपाध्यक्षमा रामसुन्दर देउजा, महासचिवमा प्रदीप सापकोटा, कोषाध्यक्षमा तारा केसी, र सदस्यहरूमा क्रमशः पूर्णबहादुर श्रेष्ठ, शुभाद्रा अधिकारी तथा वसन्तराम नकर्मी सर्वसम्मत चयन भएका छन्।
कार्यक्रममा प्रमुख अतिथि प्रा. डा. लक्ष्मणप्रसाद गौतमले पानसमा दीप प्रज्वलन गरी सभाको उद्घाटन गर्नुभएको थियो। उहाँले उद्घाटन मन्तव्यमा भन्नुभयो: ‘साहित्यिक संस्था त धेरै खुल्छन् तर समयक्रममा व्यक्तिहरूबीच मन नमिलेपछि फुट्छन्। तर सुनकोशी त्यस्तो नहोस्। यो मेरो संस्था हो भन्ने भावना सबैमा भयो भने संस्था दिगो हुन्छ। सुनकोशीलाई नामजस्तै काम गरेर देखाउने चुनौती पनि छन्। तर मलाई लाग्छ, नेतृत्वमा आउने साथीहरू सक्षम छन्।’
दुई चरणमा सम्पन्न कार्यक्रमको उद्घाटन सत्रमा नेपाल स्रष्टा समाजका अध्यक्ष श्रीओम श्रेष्ठ ‘रोदन’, साहित्यिक पत्रकार संघका अध्यक्ष राधेश्याम लेकाली, वरिष्ठ साहित्यकार पवन आलोक, लघुकथा समाज, नेपालका अध्यक्ष तुलसीहरि कोइरालालगायतले शुभकामना मन्तव्य राखेका थिए।
बन्द सत्रमा महासचिव प्रदीप सापकोटाले प्रगति प्रतिवेदन तथा कोषाध्यक्ष तारा केसीले आर्थिक प्रतिवेदन पेस गरेपछि दुवै प्रतिवेदन सर्वसम्मत पारित भएका थिए।
उद्घाटन सत्रको अध्यक्षता छविरमण सिलवालले गर्नुभएको थियो भने बन्द सत्रको अध्यक्षता निर्वाचन समितिका संयोजक श्रीबाबु कार्कीले गर्नुभएको थियो। कार्कीको संयोजकत्वमा सुमन सौरभ र अधिवक्ता विजयभक्त श्रेष्ठ सदस्य रहेको निर्वाचन समितिले सर्वसम्मत कार्यसमितिको निर्वाचन सम्पन्न गरेको थियो।
नवनिर्वाचित समितिलाई बधाई ज्ञापन गर्दै प्रा. डा. गौतमले प्रमाणपत्र वितरण गर्नुभयो भने निर्वाचन संयोजक कार्कीले शपथ गराउनुभएको थियो।
छोटो समयमै नेपाली साहित्यमा विभिन्न गतिविधिहरू गरी यस वाङ्मय प्रतिष्ठानले छुट्टै प्रभाव छोडेको छ।
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।