नागरिकहरू आजभोलि
सडकमा देखिइरहेछन्।
राग अलापिरहेछन्,
मधुर सङ्गीतको धुनसँगै अपिल गरिरहेछन्
सरकारलाई,
र भनिरहेछन् खुलेयाम —
सरकार, तिमी मलाई जल्न देऊ,
म तिम्रो लोकसभा अगाडि जल्न चाहन्छु।
सरकार, तिमी मलाई बल्न देऊ,
पानीमा सल्काएको आगोले जलेको जङ्गलजस्तै
ध्वस्त भएर, म बल्न चाहन्छु।
सरकार, तिमी मलाई गल्न देऊ,
कुहिएको आलु र सडकमा फालिएको टमाटरजस्तै
म फतक्कै गल्न चाहन्छु।
यस्तै उस्तै राग अलापिरहेछन् रे नागरिकहरू,
तर सिंहदरबार मौनता प्रदर्शन गर्दैछ।
किसानहरू खेतबारीमा छैनन्,
हातमा हलो छैन,
कोदालो र फाली छैन,
हलमा गोरु छैनन्।
किसानलाई कतै देखेजस्तो लाग्यो —
माइतीघरमा उभिएको सालिकसँगै।
उनीहरू पनि मधुर धुनमा राग अलापिरहेछन् —
सरकार, तिमी मेरो अन्नपात उठाइदेऊ बारीबाट
र बिचौलियालाई पोस्ने काम गर,
म भोकभोकै मर्न तयार छु
माइतीघरमा अनशन बसेर।
सरकार, तिमी लघुवित्त र सहकारी पठाइदेऊ मेरो आँगनमा,
म एक सय प्रतिशतको ब्याजमा
ऋणको तमसुक बनाउन तयार छु।
सरकार, तिमी मिटरब्याजी नेता पठाइदेऊ मेरो गाउँमा,
म मेरो धनीपुर्जा उसकाे नाममा
नामसारी गरिदिन तयार छु।
यस्तै यस्तै गीतहरू सुन्दै छु
संघीय संसद वरिपरि,
तर सरकार नतमस्तक छ।
तरुणहरू गुनासोका पोका नखोल,
सरकारसँग अपिल गर —
सरकार, तिमी देशमा रोजगारी सिर्जना नगर,
किनभने उसले विदेश जान पासपोर्ट बनाई सकेको छ।
सरकार, तिमी श्रमिक लैजाने देशसँग श्रम सम्झौता गर,
उ मलेसिया जान तयार छ,
उ जापान, कोरिया र कतार जाने मुडमा छ।
साइबेरियाबाट चराहरू बसाइँ सरेजस्तै,
रोजगारी खोज्ने सिलसिलामा
उ पनि देश छोडेर बसाइँ सर्दै छ।
श्रम सहिद बनाइने देशका नागरिक
बालकुमारीमा मृत्युवरण गर्छन्।
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
