साउने सङ्क्रान्ति, मैले लुतो फालेंँ।
फाल्न नसकिएको लुतो
काठमाडौँ,
साउनको हरियो किनारभर बोकेर
सडक अशान्त बगिरहन्छ,
फोहोर बोकेर छातीभर।
पखाल्नु छ सडकलाई आफैँलाई,
धुनु छ रहरहरूका मृत्युशाला र चिहानहरू,
निर्धा, निमुखा सपनाका हत्यारा,
निवात-कवच र पौलोमादीहरू,
अथवा अर्काको श्रीमान् खोस्ने शूर्पणखा,
पाएसम्म सबैका श्री खोस्ने धुन्धुकारीहरू,
पासा जता पनि पल्टाउन सक्ने शकुनीहरू
छाडा छन् र चिलाइरहन्छ काठमाडौँको गुद्वारसम्म,
जहाँसम्म चुस्छन्, चुसिरहन्छन्
लुतोका उद्धृत कीटाणुहरू।
चिल्ला कारभित्र छिपेर
कुदिरहन्छन्।
झरिरहेको छ झरी निरन्तर।
खै आगो बालेर अगुल्टो मिल्काउने रहर !
बोलिरहन्छ आत्माले–
‘लुतो लैजा !
इट्टाभट्टामा जिउँदै मान्छे पिसल्नेहरू लैजा !
लैजा, कानुनमा पिसाब फेर्ने [अ] न्यायमूर्तिहरू !
यति, ओम्नी र चियाबगान निल्नेहरू,
सिङ्गो जहाज अट्ने घ्याम्पे पेट
र पैसामा निमुखा बेचेर देशमा रगरगी गर्नेहरू
लैजा रौरव, कुम्भीपाक र महाघोर नरकहरू !
भूत, मसान र चुल्ठेहरू !
घाउ, खटिरा, पिप, राल, सिंगान लैजा !
बालकोट दरबार,
बुढानीलकण्ठ दरबार,
घरभेटी-अखाडा…
लुतो लैजा !
उत्तर खोज्नेहरू हिमाल कटी जा,
दक्षिण खोज्नेहरू वीरगन्ज तरी जा,
लुतो लैजा, छिमेकी पाँच हो !
लुतो गई जा !’
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
