लघुकथा: नयाँ परिकार | हाम्रो कथाघर

डा. चन्द्रेश कुमार छतलानी

एक जना महान् राजाको राज्यमा एक जना मगन्तेजस्तो मानिस सडकमा मृत भेटियो। कुरा राजासम्म पुग्यो र उनले यस घटनालाई अत्यन्त गम्भीर रूपमा लिई पूर्ण छानबिन गर्न आदेश दिए।

सबैभन्दा ठूलो मन्त्रीको अध्यक्षतामा एउटा समिति गठन गरियो, जसले गहन छानबिन गरी आफ्नो प्रतिवेदन पेस गर्‍यो। राजाले त्यो लामो प्रतिवेदन हेरे र आँखा साना पार्दै गम्भीर स्वरमा भने, “एक लाइनमा भन, ऊ किन मरेको थियो?”

सबैभन्दा ठूलो मन्त्रीले अत्यन्त विनम्र शब्दमा उत्तर दिए, “हजुर, किनभने ऊ भोकाएको थियो।”

सुन्ने बित्तिकै राजाका आँखा ठूला भए र उनले आँखा तर्दै मन्त्रीलाई भने, “मतलब… मेरो… राज्यमा… कोही… भो…काएको थियो!” यो भन्दाखेरि राजाले हरेक शब्दपछि एक क्षण रोकिएर अर्को शब्द बोलिरहेका थिए।

मन्त्रीले तुरुन्तै कुरा बुझे र समय नगुमाईकन उत्तर दिए, “हो हजुर, उसले ‘भू… खाएको’ थियो। त्यसैले मरेको हो। सत्य यही हो कि उसले ‘भू’ धेरै खाएको थियो।”

प्रतिवेदनमा त्यसअनुसार परिवर्तन गरियो र त्यस राज्यमा ‘भू’ नामक एउटा नयाँ परिकारको आविष्कार भयो, जुन काजु-बदाम र शुद्ध घिउले बनाइन्थ्यो।

भारतको राजस्थान, उदयपुर निवासी डा. चन्द्रेश कुमार छतलानी पेसाले कम्प्युटर विज्ञानका सहआचार्य एवं एक बहुआयामिक साहित्यकार हुनुहुन्छ। उहाँले कम्प्युटर विज्ञानमा विद्यावारिधि (पीएच.डी.) गर्नुभएको छ। उहाँका ३७ शोधपत्र, १६ मौलिक कृति र १० सम्पादित पुस्तकहरू प्रकाशित छन्।

कविता, लघुकथा बालकथा र कथा/कहानी जस्ता विधामा कलम चलाउने उहाँले नेपाली भाषामा समेत साहित्य सिर्जना गर्नुहुन्छ। साहित्य र शिक्षणमा पुर्‍याउनुभएको योगदानका लागि उहाँ ५० भन्दा बढी राष्ट्रिय तथा अन्तर्राष्ट्रिय सम्मानबाट सम्मानित भइसक्नुभएको छ।

उहाँकै नेपाली भाषामा लेखिएको यो लघुकथा “नयाँ परिकार” उहाँले स्वयम् हामीलाई पत्राचार गर्नुभएको हो।