आज म
सभ्यता होइन,
सभ्यताको पोस्टमार्टम रिपोर्ट बाँच्दै छु—
जहाँ
मनुष्यको भित्र
साँघुरिएको छ सम्पूर्ण ब्रह्माण्ड !
क्याफेमा कफीको गन्धमा बगिरहेको छ
पुराणको सूत्र,
र मन्दिरका घण्टीहरू
एउटा एपको नोटिफिकेशनमा हराइरहेछन् !
स्मृतिमा पिँजडाजस्तो जोगिएको
त्यो गाउँको एक्लो पीपल
अहिले वाइफाइ टावरमा रूपान्तरित छ
र त्यहीँबाट प्रसारण हुँदै छ—
एक ‘कन्फ्युज्ड’ भगवानको लाइभ ।
मान्छेहरूले अब श्वास लिन्छन्—
क्लोन गरिएको नीतिमा;
चर्चामा अब धर्म होइन,
बिटक्वाइनको भविष्य छ ।
साहित्य अब ब्लगपोस्ट हो,
र ब्लग अब विज्ञापनको खोल !
एउटा नास्तिक
धार्मिक क्रान्तिको पोस्टर बोकेर
र्यालीमा अगाडि हिँडिरहेको छ ।
र एउटा पादरी
पबमा वेटरलाई सम्झाउँदै छ—
“प्रेम नै ईश्वर हो !”
टिकटकको ट्रेन्डमा
अब महाभारतको युद्ध
बीस सेकेन्डको नाचमा सकिन्छ—
र अर्जुनले आफैँलाई अनफलो गरिसकेको छ ।
टावरहरूको उचाइमा
धर्तीको स्पन्दन हराइरहेछ
अनि
ध्वंसको नयाँ व्याकरणमा
कविता लेखिरहेका छन्—
आर्टिफिसियल बुद्धिहरू !
बगिरहेको छ प्लास्टिकको नदी
जहाँ आत्मा डुबुल्की मार्न खोजिरहेछ—
तर तल गहिराइमा
फेला पर्छन् केवल सेल्फीहरू !
शब्दहरूको श्मशानमा बसेको म
अहिले
मनुष्यता बचाउने मन्त्र खोजिरहेछु
र लाजसँग सम्झौता गरेर
संविधानलाई न्यानो ओढाइरहेछु ।
कसैले भन्छ—
अब क्रान्ति डिजिटल हुनेछ ।
कसैले भन्छ—
ईश्वरको प्रोफाइल डिएक्टिभ भइसकेको छ ।
म भन्छु—
अब मान्छेले
सपना होइन,
पासवर्ड परिवर्तन गर्न सिक्नुपर्छ ।
अब
धर्तीको नक्सा होइन,
नरसंहारको ग्राफ अपडेट हुँदै छ ।
र आज पनि
संसारको सबैभन्दा पुरानो भोक
“न्याय”
पखालिँदै छ—
एउटा महँगो परफ्युममा ।
इति,
पतनको पराकाष्ठा—
जहाँ स्वर्गको प्रवेशद्वारमा लेखिएको
छ:
“आउट अफ सर्भिस” ।
काठमाडौँ
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
