गाउँपालिकाको चुनाव लागिरहेको छ । जिन्दावाद-मुर्दावादका गुञ्जनले सहर-गाउँ तातिरहेको छ । होटलले मासुभात खुवाएर फुर्सद पाएको छैन । जताततै तानातान र हानाहान पनि मच्चिएकाले प्रहरी कार्यालय पनि फुर्सदमा छैन ।
यता केही वर्षदेखि सडकपेटीमा बास भएका पूर्व हेडसर कमलिकान्त त्यही पाटीमा नै थला परेका छन् । उनलाई हनहनी ज्वरो आइरहेको छ । गोडामा घाउ आएदेखि माग्न जान पनि सकेनन् । सँगै बस्ने दुई सडक बालकहरू चुनाव प्रचारमा गएदेखि बास बस्न पनि आएका छैनन् । कहिलेकाहीँ खानेकुरा ल्याएर दिन्थे । तिनीहरूको मुख देखिएको छैन । त्यसैले आज उनको पेट भरिन नपाएको तेस्रो दिन पनि हो ।
माघ महिना थियो । त्यही पाटीलाई स्टेज बनाएर हिजो एउटाले भाषण गर्न आयो । बाहिर मैलो, झुत्रो र रङ नचिनिने कम्बल ओढेर सुतिरहेका कमलिकान्तलाई हकार्दै पाटीको छहारीबाट हुत्याएर सडकमा निकालिदिए । पाटी सजाएर मञ्च बनाए । त्यहाँ दमदार भाषण चल्न थाल्यो । भाषण गर्ने वक्ताले आकर्षक मन्तव्य दिए । श्रोता र दर्शक दीर्घाबाट तालीको पर्रा छुट्दै थियो । अब त्यस पालिकाको उमेदवार र प्रमुख अतिथि सेवकलालको बोल्ने पालो आयो । उनले भने, ‘यस पालिकामा मेरो जितपछि कोही असहाय हुनुपर्ने छैन । सबैका सहारा म र गाउँपालिका हुनेछ । कसैले ओखतीमूलो नपाएर मर्नुपर्ने छैन । म सबैको ओखतीमूलो गरिदिने छु । खान नपाएर कोही मर्ने छैनन् । सबैको नाना, माना, छाना र बिमारको म प्रबन्ध गरिदिने छु ।’ कार्यकर्ताहरूले सडक उचाल्ने गरेर ताली पिटे । सेवकलाल जिन्दावादको नारा लगाए । माहोल रमाइलो बन्यो । त्यही सडक किनारमा मिल्काइएका कमलिकान्तले पनि यो सब सुनिरहे । उनको बिमार बिस्तारै बिस्तारै बढ्दै गयो । उच्च ज्वरोका कारण उनी बेहोस भए । केही दिनदेखि अन्न मुखमा परेको पनि थिएन । नातागत, घामको ताप र ज्वरोको डाहले प्याक-प्याक गर्दै त्यही थोत्रो पाटीमा उनको शरीरले यस नश्वर शरीर छोडेर सदाका लागि अस्तायो । अस्ताउनुअघि उनले छोराको वजनदार र रहरलाग्दो झुट सुने ।
बेलुका कार्यकर्ताहरूले जुलुस निकाले । ‘हाम्रा उमेदवारका पितालाई विपक्षीहरूले आक्रमण गरेर मारेका हुन् !’ – ‘कमलिकान्त जिन्दावाद !’
यतिबेला सेवकलाल सेतो किरियापुत्री पोसाकमा छ । भेट्नेहरूको लर्को र सहानुभूतिको वर्षा पनि छ । बेलाबेलामा भन्छ, ”बा’को नाम राख्नकै लागि म उमेदवार भएको हुँ । हाम्रा बा महान् शिक्षासेवी हुनुहुन्थ्यो ।'”
अक्षर आवास धादिङ
nabindahal1000@gmail.com
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
