एउटा देश छ,
देशभरि देशवासीहरू छन्
तर महासागरमा थोपाबराबर छन्–
देशलाई छातीमा बोकेर हिँड्ने,
देशको हितका लागि
सूलीमा चढ्न तम्तयार हुने
देशभक्त राष्ट्रप्रेमीहरू ।
अनि ! ती देशैभरिका देशवासीहरू… ?
उनीहरू त
क्षेत्री, बाहुनहरू हुन्,
कामी, दमाई, सार्कीहरू हुन्,
राई, मगर, तामाङ र गुरुङहरू हुन्,
जो आफूआफैँ मौलाउने प्रयत्न गरिरहेछन्
सिङ्गो देशलाई भुलेर ।
उनीहरू त
उमेरले सीमा नाघेपछि
सीमा पार गर्न नसकेका
लाचार वृद्ध-वृद्धाहरू हुन् !
राहदानीका लागि लर्को लगाएर
कार्यालय–कार्यालय भौतारिँदै हिँड्ने
बेरोजगार र आक्रोशित युवाशक्ति हुन् !
राहदानी लिन बालिग बन्ने प्रतीक्षामा
जबर्जस्ती उमेरलाई धकेलिरहेका
नाबालिग बालबालिकाहरू हुन्,
जो लाचार छन्, विवश छन्,
बाध्यताका जन्जिरले जकडिएका छन्,
जसले चाहेर पनि सकिरहेका छैनन्
देशलाई अँगालोभरि कस्न !
उनीहरू त
हिमाली, पहाडी,
त कोही मधेशीहरू पो हुन्,
जो हिमाल लेख्छन्, पहाड गाउँछन्,
मधेश गुनगुनाउँछन्
तर देश बोल्दैनन्, देश सुन्दैनन् ।
उनीहरू त
हिन्दु हुन्, बौद्ध हुन्, मुस्लिम त
कोही इसाई, क्रिश्चियनहरू पो हुन् !
जो मलजल गर्न जान्दछन्
आफ्नै मात्र धार्मिक संस्कृतिलाई ।
उनीहरू त
विभिन्न राजनीतिक दलहरूका
नेता, कार्यकर्ताहरू हुन्,
भ्रष्टाचारी हुन्, दलाल हुन्
वा हुन् स्वार्थले पुरिएका
विभिन्न अभियानका अभियन्ताहरू,
जो जारी गरिरहन्छन्
भिन्न–भिन्न नामका अभियान
र देशलाई नै खोक्रो बनाइरहन्छन्
हरबखत,
तर अहँ !
रत्तिभर नियालेर हेर्दैनन्
देशको दयनीय अवस्थालाई,
देशलाई सर्वोच्च बनाउने
क्षमता हुँदाहुँदै पनि
न सिन्को भाँच्छन् देशका नाममा
न भाँच्न दिन्छन् सिन्को भाँच्नेहरूलाई ।
साँच्चै,
देशमा भएकाहरू सबैले
देशलाई आफूजत्तिकै माया गरिदिए,
देशभरिका देशवासीहरू
एक परिवारझैँ बनिदिए,
हरेक देशवासीको मुखबाट
“‘मेरो देश र मेरा देशवासी’
‘म र मेरो परिवार’ बराबर हो” भन्ने शब्द
मन्त्रजस्तै गुञ्जायमान भइदिए !
के देश देशजस्तै हुँदैनथ्यो होला त ?
के देश देशजस्तो छ त ?
–०००–
कुमाख गा.पा.–२, सल्यान, कर्णाली प्रदेश, नेपाल।
हाल: जालन्धर, पंजाब, भारत।
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
