आफूलाई आधा पारेर,
आफूलाई जिउँदै मारेर,
रगतले भाग्य लेख्ने,
केही नदेख्दा पनि सन्तान देख्ने ।
आफूलाई निचोरेर अरूलाई अघाउन सक्ने,
प्राण भर्ने, सृष्टिलाई अघि बढाउन सक्ने ।
देवता छन्, पत्यार छैन, मेरी आमा छैनन्,
लाग्छ मेरो संसार छैन, मेरी आमा छैनन् !
कसले लगाइदिन्छ दसैँको टीका?
को बुझ्छ मर्म यो आँसुको ढिका?
शिरमा आउने हात आफैँले खरानी बनाएँ,
पिरमा आउने हात आफैँले खरानी बनाएँ ।
अब निधार, निधार छैन, मेरी आमा छैनन्,
लाग्छ मेरो संसार छैन, मेरी आमा छैनन् !
अहिले भान्सामा नुन छैन, आगनमा बिस्कुन छैन,
एउटा तस्बिर छ कुनामा, त्यसबाट आवाज आउँदैन ।
कतैबाट आउँदा बोलाउँछिन् कि जस्तो लाग्छ,
घुम्दै घाट आउँदा बोलाउँछिन् कि जस्तो लाग्छ ।
परिवारजस्तो परिवार छैन, मेरी आमा छैनन्,
लाग्छ मेरो संसार छैन, मेरी आमा छैनन् !
सोच्छु, एकदिन म पनि सकिन्छु, दियो बाल्छु,
हरेक दिन फोटो राखेर जल दिन्छु, दियो बाल्छु ।
दियो पालामा छ, पोल्छ कि जस्तो लाग्छ,
फोटो मालामा छ, बोल्छ कि जस्तो लाग्छ ।
नदी भएँ, मेरो किनार छैन, मेरी आमा छैनन्,
लाग्छ मेरो संसार छैन, मेरी आमा छैनन् !
कसले कुर्ला खाना? गलत केले मेटाउँला?
आमा, तिमी छैनौ, तिम्रो आदत केले मेटाउँला?
योभन्दा बढी अब के पाऊँला, के गुमाऊँला?
सके छिटै भेटौँला, नसके दु:ख फोटोलाई सुनाऊँला ।
मेरा सपना साकार छैन, मेरी आमा छैनन्,
लाग्छ मेरो संसार छैन, मेरी आमा छैनन् !
यी लोक चार, यो लोकाचारभन्दा पर,
त्यो चीर शान्ति तिम्रो आफ्नै स्थायी घर ।
कस्तो होला ठाउँ, फर्किनै मन नलाग्ने,
कसैको याद नआउने, सबै भुलाउने ।
कहिलेकाहीँ सपनामा आउनु, बोलौँला, भेटौँला,
तिम्रो हातको सिरानी राखौँला, म न्यास्रो मेटौँला ।
शरीर छ, स्याहार छैन, मेरी आमा छैनन्,
लाग्छ मेरो संसार छैन, मेरी आमा छैनन् !
घरमा एउटा टुहुरो बाछो छ, कराइरहन्छ,
लाग्छ यसले पनि मैले झैँ आमा बोलाइरहन्छ ।
अरू बाछाबाछी कराउँदा उस्को माउ कराउँछ,
टुहुरोको कोही कराउँदैन,
आमा बोल्ने आशाको घाउ कराउँछ ।
अब कहाँ जानु छ र? के खानु छ र?
फुस्किएर जाने हतार छैन, मेरी आमा छैनन्,
लाग्छ मेरो संसार छैन, मेरी आमा छैनन् !
–०००–
सिरानचोक ३, हर्मी, गोरखा
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
