सातपत्रे झोलीमा
आफ्नो ओजन भन्दा दोब्बर भारी
कम्पनीको ठेक्का अनि
स्वयंको सर्वाङ्ग संसार बोकेर
साँघुरो अनि चिप्लो
पाकडण्डीको दैनिकी दौडमा
– सुव्यवस्थित
अत्याधुनिक ट्रयाकमा
महिनौं प्रयासरत प्रशिक्षित धावक
बोल्ट अनि मिल्खाहरुलाई
पछि पार्ने तरिकाले दौडने
चियाबारीकी छोरी-मेरी आमा
रोगग्रस्त भएकी छिन्।
क्षणमै माइल नाप्ने बलिष्ट गोडाहरु
शौचालय सम्म पनि जानै सक्दैन
हजारौं मुना चुँडेर
नथाक्ने औंलाहरू
चिउडोको जुठो झार्नै सक्दैन
अशक्त असहाय जीर्ण शरीरसँग
ओछ्यान् मै परेकी छिन्
चियाबारीकी छोरी-मेरी आमा।
आँधी-हुरी, बर्खा खडेरी
टाउको दुखाइ, रुघा खोकी केहीको पर्वाहै थिएन
थियो त
बोनसको बढोत्तरी अनि डवलीको आशा
यी दुईको आशातीत कल्पना भित्र
उसको वास्तविकता,
बाध्यता र विपना यसरी हातेमालो गर्थ्यो:-
“भाल्टाङ- भुलटुङ्गको पढाई- लेखाईमा
नयाँ राम्रा नाना
चिचिमाम चांढमा
प्रसादी – भेटी
भगवानको पूजामा
दान – दक्षिणा
दशैं र तिहारमा
विपनाको यस्तो जटिल आवश्यकता
मात्र सपना सरह
कहिल्यै पूरा नहुने गरी
यथार्थताको हातेमालो छुट्याएर
उ संगै लम्पसार परेकि छिन्
निकै सिकिस्त भएकी छिन्
चियाबारीकी छोरी-मेरी आमा।
व्यवस्थाले बेवास्ता गरेको
कमाने जीवन
दूधको तातो घुट्को न निल्नु न त ओकल्नु
झोली भन्दा गलेको फाटेको जीवन
न गरी खानु न त मरी जानु
हिजो र आजमा फरक नभएको
भोलि परिवर्तनको आशै नरहेको
केवल नारा जुलुस
लामा भाषण र आश्वासन
शोषण अनि षड्यन्त्रले कैदी बनाएको
बगाने जीवन
सन्तान दर सन्तान उस्तै अवस्था
कहिल्यैँ नमिलेको तह र व्यवस्था
युद्ध नलडेको हैन
संघर्ष छोडेको पनि छैन
परिपाटी यथावत रहेपछि
आफै परिवर्तन भएकी छिन्
स्वस्थ हुन नसक्ने गरी
बिरामी परेकी छिन्
चियाबारीकी छोरी-मेरी आमा।
चियाबारीकी छोरी मेरी आमा।।
✍️अरुण कुमार भुजेल
गोरूबथान कालेबुङ भारत।
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
