‘अमरज्योति’ साहित्यिक पत्रकारिता विशेषाङ्क र मातृका पोखरेलको कथासङ्ग्रह विमोचन

‘अमरज्योति’ साहित्यिक पत्रकारिता विशेषाङ्क र मातृका पोखरेलको कथासङ्ग्रह विमोचन

काठमाडौँ, २५ पुस ।
नेपाल विद्युत प्राधिकरण, विद्युतकर्मी साहित्यिक समाजको आयोजनामा दुई महत्वपूर्ण कृतिको विमोचन सम्पन्न भएको छ । शुक्रबार रत्नपार्कस्थित प्राधिकरणको केन्द्रीय कार्यालयको सभाहलमा आयोजित एक विशेष समारोहका बीच समाजको त्रैमासिक प्रकाशन ‘अमरज्योति’ को अङ्क ६८ (साहित्यिक पत्रकारिता विशेषाङ्क) र प्राज्ञ मातृका पोखरेलको कथासङ्ग्रह ‘मलाई पनि निद्रा लागेन’ सार्वजनिक गरिएको हो ।

वरिष्ठ साहित्यकार नगेन्द्रराज शर्माको प्रमुख आतिथ्यमा सम्पन्न उक्त कार्यक्रममा नेपाल स्रष्टा समाजका अध्यक्ष श्रीओम श्रेष्ठ ‘रोदन’, समीक्षक डा. हरि सिलवाल र नेपाल साहित्यिक पत्रकार सङ्घका अध्यक्ष मोहन दुवाल विशेष अतिथिका रूपमा उपस्थित हुनुहुन्थ्यो । प्रमुख अतिथि तथा विशेष अतिथिहरूले संयुक्त रूपमा पुस्तक र पत्रिकाको विमोचन गर्नुभएको थियो ।

कार्यक्रममा मन्तव्य राख्दै प्रमुख अतिथि नगेन्द्रराज शर्माले नेपाली साहित्यिक पत्रकारिता अझै पनि सङ्कटपूर्ण अवस्थाबाट गुज्रिरहेको बताउनुभयो । उहाँले भन्नुभयो, “अहिले साहित्यिक पत्रकारिता धेरै हदसम्म लहड र सनकको भरमा टिकेको छ, तर यो समाजसेवाको एउटा बलियो माध्यम पनि हो ।”

कृतिमाथिको समीक्षा
विमोचित ‘अमरज्योति’ साहित्यिक पत्रकारिता विशेषाङ्कमाथि समीक्षा गर्दै वरिष्ठ साहित्यिक पत्रकार श्रीओम श्रेष्ठ ‘रोदन’ ले यस अङ्कले नेपाली साहित्यिक पत्रकारिताको इतिहास र वर्तमानलाई बुझ्न महत्त्वपूर्ण सघाउ पुर्‍याउने धारणा राख्नुभयो । त्यस्तै, डा. हरि सिलवालले मातृका पोखरेलको कथासङ्ग्रह ‘मलाई पनि निद्रा लागेन’ माथि टिप्पणी गर्दै संवेगात्मक र सामाजिक यथार्थको सन्तुलन कथामा पाइने उल्लेख गर्नुभयो ।

कार्यक्रममा कथाकार मातृका पोखरेलले आफ्नो कृतिको सिर्जना प्रक्रियाबारे जानकारी दिनुभएको थियो भने प्राधिकरणका उपकार्यकारी निर्देशक तुलाराम गिरीले ‘अमरज्योति’ ले प्राधिकरणभित्रको साहित्यिक वातावरणलाई उचाइ दिएको बताउनुभयो ।

विशेषाङ्कको विशेषता
‘अमरज्योति’ को यस विशेषाङ्कमा साहित्यिक पत्रकारिताका विविध आयाममा केन्द्रित २६ जना लेखकका लेखहरू समावेश छन् । जसमा नगेन्द्रराज शर्माको अन्तर्वार्ताका साथै ऋद्धिबहादुर मल्ल, रोचक घिमिरे, कर्ण दयाल ‘सोराडी’, कुलप्रसाद पराजुली, जीवन शर्मा, डा. टंक उप्रेती, ठाकुर बेलवासे, ताराप्रसाद वस्ती, नवराज रिजाल, निर्मल अर्याल, परशुराम अधिकारी, पवन आलोक, पुष्य घिमिरे, प्रकाश थापामगर, बोधराज पौडेल, मनु बि.क., मातृका पोखरेल, माधव घिमिरे ‘अटल’, मोहन दुवाल, रामेश्वर राउत मातदास, लक्ष्मी भट्टराई ‘परिधि’, विमल भौकाजी, शब्दसेना, शशिधर भण्डारी र शान्तिराम भट्टराई ‘शाराभ सिन्धु’ का लेखहरू रहेका छन् ।

विद्युतकर्मी साहित्यिक समाजका अध्यक्ष एवं पत्रिकाका प्रधान सम्पादक विष्णुप्रसाद आचार्य ‘अतृप्त’ को अध्यक्षतामा सम्पन्न उक्त कार्यक्रमको सञ्चालन कार्यकारी सम्पादक युवराज शर्माले गर्नुभएको थियो । समाजकी उपाध्यक्ष शारदा पराजुलीले स्वागत मन्तव्य राख्नुभएको सो कार्यक्रममा लेखकहरूलाई पारिश्रमिक र अतिथिहरूलाई मायाको चिनो प्रदान गरिएको थियो । कार्यक्रममा ठूलो सङ्ख्यामा साहित्यिक पत्रकार तथा लेखकहरूको उपस्थिति रहेको थियो ।