मैले पुरानो घर भत्काउदै गर्दा
आमाले आँसु झार्दै भन्नू भो
यो घरनै तेरो जन्म घर हो
जुन घर बनाउन सुरु गर्दा
त गर्भमा थिइस
घर जति सानो र कमजोर छ
मेरो मन पनि उत्ति नै कमजोर छ
यहि घर बनाउदा म सात दिन भोको बसेकि छु,
यसलाइ लाग्ने काठ ओसार्दा
फुटेको थियो तेरा ‘बा’को काँध
यहि घरको गार्हो लगाउन
ढुङ्गा ओसार्दा पुछेकी थिए
हत्केलाले पसिनाका सयौ थोपा
जसो – तसो बन्यो घर
गाउँघर समाजको अस्तित्वमा
ठडियो एउटा नयाँ बामपुड्के घर
लगत्तै उदय भइस त मेरो गर्भबाट धरतीमा ।
अब हाम्रो मेहनतको इतिहास र
तेरो जन्म सालको प्रतीक
भग्नावशेष पनि रहनेछैन एक्छिनमा
तब म कसरी नरुन सक्छु
कि,नयाँ बन्ने घरको खुशिमा !
भुकम्पको चपेटाले चिरा परेको घर भत्काउँदै
नयाँ घर बनाउन तम्सिएको मैले
आमालाई सम्झाउनै सकिन,
कि नयाँ संरचना बनाउन
पुरानो संरचना भत्काउनै पर्छ भनेर ।।
प्रतिक्रिया