राजबाबु श्रेष्ठ ‘सागर’को कथासंग्रह ‘फिर्दोसको साँचो’ सार्वजनिक
काठमाडौं। — साहित्यकार राजबाबु श्रेष्ठ ‘सागर’को नयाँ कथासंग्रह ‘फिर्दोसको साँचो’ लोकार्पण गरिएको छ। नेपाल प्रज्ञा प्रतिष्ठानको पारिजात कक्षमा शुक्रबार आयोजित विशेष समारोहबीच उक्त कृतिको विमोचन गरिएको हो।
समारोहमा प्रा.डा. रामप्रसाद ज्ञवाली, प्रा.डा. अर्चना थापा, समालोचक अनुपमा रेग्मी, सप्रा.डा. अशोक थापा, लेखक स्वयं राजबाबु श्रेष्ठ तथा सञ्चालक हेम भण्डारीको उपस्थितिमा पुस्तक विमोचन गरिएको हो। कार्यक्रमको सुरुवात राष्ट्रगानबाट गरिएको थियो भने स्वागत मन्तव्य डा. अशोक थापाले राखेका थिए।
समालोचक अनुपमा रेग्मीले संग्रहमा समावेश कथाहरू सामाजिक यथार्थ, उत्पीडन, जातीय तथा लैंगिक विभेदजस्ता गहन विषयवस्तुमा आधारित रहेको बताइन्। उनले लेखकको सशक्त अभिव्यक्ति र स्वरकल्पनाको प्रयोगले पाठकलाई आकर्षित गर्ने धारणा राखिन्।
वरिष्ठ समालोचक अर्चना थापाले सबै कथा प्रभावशाली रहेको बताउँदै नारी सौन्दर्यको चित्रण केही अश्लील लाग्न सक्ने संकेत गरिन्। तर कथाहरूको अन्त्यसम्म पाठकलाई बाँधेर राख्ने लेखकको शैलीप्रति प्रशंसा जनाइन्।
प्रा.डा. ज्ञवालीले लेखकको लेखनशैलीमा यथार्थवाद र अतियथार्थवादको मिश्रण देखिने बताए। उनले ‘खामभित्रको चिठ्ठी’ कथालाई संग्रहको उत्कृष्ट कथा ठहर गर्दै ‘निर्जला’ कथामा दलित समुदायप्रति देखाइएको यथार्थतालाई विशेष प्रशंसा गरे।
लेखक श्रेष्ठले सौन्दर्य चित्रणबारे उठेका प्रश्नहरूमा जवाफ दिँदै दृश्यलाई जसरी देखिन्छ, त्यसरी लेख्नु लेखकको कर्तव्य रहेको बताए। उनले सौन्दर्य, चरित्र, घटना र स्थानीय परिवेशलाई सन्तुलित ढंगले समेट्नु कथाको सम्पूर्णता हो भन्ने तर्क प्रस्तुत गरे।
कार्यक्रममा सभाध्यक्ष वा प्रमुख अतिथि नराखिने निर्णयलाई धेरैले नयाँ प्रयोगका रूपमा लिएका थिए। सहभागीहरू मध्ये लगभग ९५ प्रतिशतले पुस्तक किनी लेखकबाट हस्ताक्षर गराएका थिए।
‘फिर्दोसको साँचो’ इन्डिगो इन्क प्रकाशनद्वारा प्रकाशित गरिएको हो। यसअघि लेखकका ‘बन्द फ्रेमभित्रको चिठ्ठी’, ‘हराएका छोराहरू’, ‘देशको चिना’ तथा ‘यादका बस्तीहरू’ जस्ता कृतिहरू पाठकमाझ आइसकेका छन्।
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
