काठमाडौं । सुनकोसी वाङ्मय प्रतिष्ठानको आयोजनामा ठमेल काव्योत्सव भव्य रूपमा सम्पन्न भएको छ। नयाँ वर्ष २०८२ को उपलक्ष्यमा आयोजित सो कार्यक्रम शनिबार ठमेल चि:वहालमा सम्पन्न भएको हो।
काव्योत्सवमा अग्रजदेखि अनुजसम्मका करिब तीन दर्जन कविहरूले आ–आफ्ना रचना वाचन गरेका थिए। कार्यक्रमको समुद्घाटन काठमाडौं महानगरपालिका–२६ का वडा अध्यक्ष ख्यामराज तिवारी, कवि तथा निर्देशक राजेन्द्र शलभ, र वरिष्ठ लोकगायक मच्छेश्वर सापकोटाले पानसमा दीप प्रज्वलन गरी संयुक्त रूपमा गरेका थिए।
चि:वहाल परिवार, ठमेलको सह–आयोजनामा सम्पन्न उक्त काव्योत्सवमा वडा अध्यक्ष तिवारीले समाज सुधारमा कविको कलमले टेवा दिन सक्ने उल्लेख गर्दै साहित्यिक सहकार्यका लागि आफू सधैं तयार रहेको बताए।
कार्यक्रमका विशिष्ट अतिथि कवि, निर्देशक तथा गीतकार राजेन्द्र शलभले कविता वाचन गर्दै आयोजक संस्थालाई धन्यवाद ज्ञापन गरे। अर्का विशिष्ट अतिथि वरिष्ठ लोकगायक मच्छेश्वर सापकोटाले लोकगीत मार्फत विकृति र विसंगतिविरुद्ध दृढ आवाज उठाउनुपर्नेमा जोड दिए।
साहित्यकार स्नेह सायमीले चि:वहालको महत्वमाथि मन्तव्य दिँदै कविता सुनाएका थिए। त्यस्तै, वरिष्ठ साहित्यकार श्रीओम श्रेष्ठ ‘रोदन’ले प्रतिष्ठानले स्थापनाकालदेखि नै उल्लेखनीय साहित्यिक गतिविधिहरू गर्दै आएकोमा खुसी व्यक्त गरे।
कविता वाचन कार्यक्रममा सहभागी प्रमुख स्रष्टाहरूमा कृष्ण वाउसे, श्रीबाबु कार्की, डा. अनन्त अधिकारी, मधु पाठक, विमल भौकाजी, शकुन्तला जोशी, दियश रत्न शाक्य, देविका तिमिल्सिना, तारा केसी, विश्व सिग्देल, मुरारी सिग्देल, सुषमा आचार्य, दीपक चौलागाई, शशीश्री आचार्य, रुपा रिसाल, धर्म थापा ‘पुरुष’, राजुबाबु श्रेष्ठ, माधव विंडारी, लक्ष्मण सापकोटा, रमा अधिकारी ‘कादम्बरी’, गंगा थापा अधिकारी, मिनकुमार नवोदित, पूर्णबहादुर श्रेष्ठ ‘हृदयंकृत’, विष्णु थापा, गोविन्दराज पौडेल लगायत रहेका थिए।
कार्यक्रम सुनकोसी वाङ्मय प्रतिष्ठानका अध्यक्ष छविरमण सिलवालको अध्यक्षता तथा महासचिव प्रदीप सापकोटाको सञ्चालनमा सम्पन्न भएको थियो। प्रतिष्ठानका उपाध्यक्ष रामसुन्दर देउजाले स्वागत मन्तव्य व्यक्त गरेका थिए।
काव्योत्सवको सह–आयोजक चि:वहाल परिवार तथा पार्टनर ‘इ–खबर डटकम’ रहेका थिए। कार्यक्रममा कवि, लेखक र साहित्यप्रेमीको उल्लेख्य उपस्थिति रहेको थियो।
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
