काठमाडौं। स्रष्टा मोदनाथ खनालको प्रबन्ध कृति ‘मानिस किन बिदेसिन्छन्!’ को लोकार्पण राजधानीमा एक विशेष समारोहबीच सम्पन्न भयो।
उक्त कार्यक्रममा पूर्वराजदूत तथा परराष्ट्रविद् डा. दिनेशराज भट्टराई, पूर्वमन्त्री चीनकाजी श्रेष्ठ, वरिष्ठ पत्रकार किशोर नेपाल, नेपाली कांग्रेसका नेता गुरु बराल, छविरमण सिलवाल, प्रा.डा. मुकुन्द लामिछाने, समालोचक ज्ञानु अधिकारी तथा स्रष्टा मोदनाथ खनालले संयुक्त रूपमा कृति विमोचन गरे।
कार्यक्रममा प्रमुख अतिथि भट्टराईले वाल्यकालदेखिका प्रसंगहरुदेखि लिएर नेपालका विविध विशेषताहरू समेटिएको यस कृतिले नेपालको वर्तमान राजनीतिक बेथिति उजागर गरेको र मानिसहरू बिदेसिनुका कारणहरू प्रष्ट पारेको बताए।
पूर्वमन्त्री चीनकाजी श्रेष्ठले वर्तमान नेपाली राजनीतिप्रति रोष प्रकट गर्दै भने, “राजनीति लोभीपापीहरूको अखडा बनेको छ। असल व्यक्तित्वहरू पछि पर्ने अवस्थाले देश दुरावस्थामा पुगेको हो। खनालजस्ता इमान्दार व्यक्तिहरूले नेपाल फर्केर राजनीतिमा सक्रिय हुनुपर्छ। सहि मान्छेले सहि ठाउँ नपाएर बिदेसिनु परेको वर्तमान यथार्थता हो।”
कांग्रेस नेता गुरु बरालले पनि राजनीतिक बेथिति प्रति असन्तुष्टि जनाउँदै नेताहरूको भनाइ र गराइमा ठूलो फरक रहेको बताए।
वरिष्ठ पत्रकार किशोर नेपालले कार्यक्रमलाई शुभकामना मन्तव्य दिँदै सम्बोधन गरे।
कृतिमाथि संक्षिप्त टिप्पणी गर्दै समालोचक ज्ञानु अधिकारीले भनिन्, “पुस्तकको शिर्षक नै मुर्त छ। आजको ज्वलन्त विषयलाई आत्मसात गर्दै सर्जकले भोगाइ र अनुभूति मार्फत लेखिएको कृति हो। यसमा बिदेसिएका नेपालीहरूको मनोदशा र दलहरूका अदूरदर्शिताले सिर्जिएको बाध्यता प्रस्ट्याइएको छ।”
प्रा.डा. मुकुन्द लामिछानेले कृतिलाई दार्शनिक चेतसहित लेखिएको बताउँदै भने, “मूलतः दर्शन र राजनीतिलाई विषयवस्तु बनाएर नेपालीहरू राजनीतिक कारणले बिदेसिन बाध्य भएका तथ्यहरू उजागर गरिएको छ। तीन ठूला दलहरूको अक्षम्यताको परिणामस्वरूप मानिसहरू बिदेसिन बाध्य भएका छन् भन्ने कुरा कृतिले स्पष्ट पारेको छ।”
कृतिकार मोदनाथ खनालले लेखन प्रक्रियाबारे अनुभव सुनाउँदै भने, “लेख्न थालेँ र किताब बन्यो। मेरो भोगाइ र अनुभूतिको अभिव्यक्ति हो यो कृति।”
सुनकोसी वाङ्मय प्रतिष्ठानको आयोजनामा सम्पन्न कार्यक्रममा कवि एवं सञ्चारकर्मी ठाकुर बेलवासेले सञ्चालन र प्रतिष्ठानका महासचिव कवि तथा नियात्राकार प्रदीप सापकोटाले स्वागत मन्तव्य राखेका थिए। कार्यक्रम प्रतिष्ठानका अध्यक्ष कवि छविरमण सिलवालको अध्यक्षतामा सम्पन्न भएको थियो।
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
