(स्रोतकथा)
लघुकथा: खराब
– प्रतिज्ञा प्रतिज्ञा
“यसरी गर्नुहुँदैन, छोरी!”— उनले भने।
“के गरिछे र छोरीले?”— सन्ध्याले सोधिन्।
“घरिघरि बुबाको टोपी र चस्मा तान्ने गरिरहन्छे।”
“बिचरी सानी छे, अलिअलि चकचक त गरिहाल्छे। सहिदिँदा के हुन्छ?”— सन्ध्याले भनिन्।
“तिमीले गर्दा नै उसमा त्यस्तै बानीको विकास भएको छ,”— उनले प्रसंगलाई गम्भीर बनाउँदै भने।
सन्ध्याले विषय मोड्न खोज्दै भनिन्,— “भयो, कति रिसाउनुभएको! बरु जानुस् न, आँप टिप्न। अघि गएकी थिएँ, सकिनँ। नजिकै भएकोले टिपेर ल्याइदिनुस्।”
थोरै समयपछि उनले आँप टिपेर ल्याए। सन्ध्याले आँपलाई राम्ररी नियालीन् ।
“के हेरेको त्यसरी?”— उनले प्रश्न गरे।
“हेर्नुस् त, बुढा! त्यो रुख नै खराब हो कि जस्तो लाग्यो। टिपेका फल सबै बिग्रिएका रहेछन्,”— सन्ध्याले चिन्तित हुँदै भनिन्।
सन्ध्याको कुरा सुनेपछि उनको अनुहार अँध्यारो भयो। यो देखेर सन्ध्याले सोधिन्,— “के भयो, बुढा?”
उनले गहिरो स्वरमा भने,— “छोरीमा पनि खराब बानी छ भनेर कसैले हामीलाई यस्तै भन्यो भने?”
~~~०००~~~
(उत्तरकथा)
लघुकथा: सुधार
– लक्ष्मी रिजाल
[ रुपनगर, सप्तरी ]
सन्ध्याको भनाइले उनको मनमा गहिरो घाउ बनायो। छोरीका साना चकचकलाई आफूले गलत दृष्टिकोणले हेरिरहेको भन्ने कुरा उनले सोच्न थाले।
रातभरि उनि आफ्नो मनको भारीसँग संघर्ष गरिरहे। सानो छोरीका साना बानीहरूलाई ठूला गल्ती ठान्दै सधैं गुनासो गरिरहने आफ्नो स्वभाव परिवर्तन गर्नुपर्छ भन्ने कुरा उनलाई महसुस भयो।
भोलिपल्ट बिहान सन्ध्या भान्सामा थिईन्।
“सन्ध्या, छोरी कता छे?”— उनले सोधे।
“कोठामा खेलिरहेकी छे।”
उनी छोरी भएको कोठामा गए। छोरीले बुबाको टोपी र चस्मा लगाएर झर्केझर्के अनुहार बनाउँदै थिई।
“ए, मेरी सानी नानी, के गरिरहेकी छ्यौ?”— उनले हाँस्दै सोधे।
छोरीले मुस्कुराउँदै भनिन्,— “म बुबा भएजस्तो गर्दै छु।”
छोरीको उत्तरले उनको आँखामा आँसु ल्यायो।
“मेरो नानी त मेरो जस्तै बन्न खोजिरहेकी रहिछे। तर म त तँलाई राम्रो उदाहरण दिन असफल भएँछु। अब म आफूलाई सुधार्छु, ताकि तँ राम्रो बानीको मान्छे बन्लिस्।”
त्यसपछि उनले छोरीलाई आफ्नो काखमा राखेर माया गरे।
सन्ध्या भान्साबाट यो दृश्य हेरिरहेकी थिईन्। उनी मुस्कुराउँदै कोठामा आइन्।
“अचम्म! आज तपाईंको स्वभाव फेरिएको देख्दा खुसी लाग्यो।”— सन्ध्याले भनिन्।
“हिजो तिमीले भनेको खराब रुख र बिग्रिएको फलको कुराले मेरो मनमा घोच्यो। मैले बुझें, हामीलाई आफ्नो छोरीलाई दोष दिनुभन्दा पहिला आफूलाई सुधार्न जरुरी छ।”
नेपाली भाषा साहित्यलाई माया गरेर यहाँसम्म आइ, यहाँ प्रकाशित लेख/रचनाहरू पढिदिनु भएकोमा तपाईँलाई धेरै धेरै धन्यवाद। तपाईँले भर्खरै माथि पढेको लेख/रचना कस्तो लाग्यो कमेन्ट बक्समा आफ्नो प्रतिक्रिया राख्न सक्नु हुनेछ। आफ्नो मनमा लागेको प्रतिक्रिया राख्न तपाईँ स्वतन्त्र हुनुहुन्छ। यदि तपाईँ पनि नेपाली भाषा साहित्यमा कलम चलाउनु हुन्छ भने आफ्नो छोटो परिचय र एक प्रति अनुहार चिनिने तस्बिर सहित आफ्ना लेख/रचनाहरू हामीलाई hamrokathaghar@gmail.com मा पठाउन सक्नु हुनेछ। अन्य कुनै पनि जानकारीका लागि +९१८७३८०९३५७३ नम्बरमा ह्वाट्सएप गर्न सक्नु हुनेछ। धन्यवाद । नोट: यहाँ प्रकाशित कुनै पनि लेख/रचनाहरू लेखकको वा 'हाम्रो कथा घर' को अनुमति बिना कुनै पनि माध्यमबाट प्रकाशन प्रसारण गर्न पाइने छैन । अन्यथा, यस्तो गरिएको पाएमा प्रचलित कानुन बमोजिम कारबाही गरिने जानकारी गराउँदछौ।
